ກົມທີ່ດິນກະຊວງ ຊສ ສົມທົບກັບພະແນກຊັບພະຍາກອນທຳມະຊາດ ແລະ ສີ່ງແວດລ້ອມແຂວງຫົວພັນ ຈັດຊຸດຝຶກອົບຮົມວຽກງານການຮັບຮູ້ສິດນໍາໃຊ້ທີ່ດິນຕາມປະເພນີ ແລະ ທີ່ດິນປ່າໄມ້ ຢູ່ໃນເຂດ 03 ປະເພດປ່າ ຂື້ນທີ່ພະແນກການດັ່ງກ່າວໂດຍການສະໜັບສະໜູນ ຂອງໂຄງການຮ່ວມມືລາວ-ເຢຍລະ ມັນ, ພາຍໃຕ້ແຜນງານ GIZ-LETeS, ໄດ້ເປີດຂື້ນ ແລະ ປິດລົງດ້ວຍຜົົນສຳເລັດດີ ຄັ້ງວັນທີ່ 23 ສິງຫາ ເຖິງວັນທີ່ 3 ກັນຍາ 2021 ຜ່ານມານີ້ ພາຍໃຕ້ການເປັນປະທານ ຂອງທ່ານ ແກ້ວປະສິດ ນຶກມະນີວົງ ຮອງຫົວຫນ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ,ທີມງານຄູຝຶກກະຊວງ,ກົມ ທີ່ດິນ,ຊ່ຽວຊານGIZ, ວິຊາການ ພຊສ ແຂວງ ,ວິຊາການຈາກພະແນກກະສິກໍາ ແລະ ປ່າໄມ້ແຂວງ,ວິຊາການຫ້ອງການສະຫະພັນແມ່ຍິງແຂວງ,ວິຊາການຫ້ອງການຊັບພະຍາກອນ ທຳມະຊາດ ແລະ ສິ່ງແວດລ້ອມເມືອງ,ວິຊາການຫ້ອງການກະສິກຳ ແລະ ປ່າໄມ້ເມືອງ ສາມເມືອງເປົ້າໝາຍໂຄງການຄື: ເມືອງ ຫົວເມືອງ, ເມືອງ ຊ່ອນ ແລະ ເມືອງ ແອດ ເຂົ້າຮ່ວມທັງໝົດ 30 ທ່ານ, ຍິງ 08 ທ່ານ
ເພື່ອຈັດຕັ້ງຜັນຂະຫຍາຍກົດໝາຍທີ່ດິນ,ສະບັບເລກທີ່ 70/ສພຊ, ລົງວັນທີ 21 ມິຖຸນາ 2019, ໂດຍສະເພາະມາດຕາ44 ແລະ ມາດຕາ130 ທີ່ເວົ້າເຖິງການຮັບຮູ້,ການຄອບຄອງ ແລະ ນຳໃຊ້ທີ່ດິນ ຂອງປະຊາຊົນທີ່ອາໃສ ແລະ ທຳການຜະລິດຢູ່ໃນເຂດທີ່ດິນປ່າໄມ້ໃນການຈັດຕັ້ງປະຕິບັດໂຄງການທົດລອງຢູ່ໃນເຂດ 3 ປະເພດປ່າ, ແນ່ໃສ່ເພື່ອສ້າງ ແລະ ປັບປຸງນິຕິກຳລຸ່ມກົດໝາຍ ແລະ ຄູ່ມືແນະນຳ,ເພຶ່ອເປັນບ່ອນອີງໃຫ້ແກ່ການການອອກໃບຢັ້ງຢືນການນຳໃຊ້ທີ່ດິນ ແລະ ຂື້ນທະບຽນອອກໃບຕາດິນໃນຕໍ່ໜ້າ ໃຫ້ຖືກຕ້ອງ ແລະ ສອດຄ່ອງຕາມກົດໝາຍ.
ຊຸດຝຶກອົບຮົມຄັ້ງນີ້ ທ່ານ ສອນທະສິນ ສີສຸພັນ ຄູເຝີກຈາກກົມທີ່ດິນໄດ້ຜ່ານບົດລາຍງານຜົນການຝຶກ ອົບຮົມພາຍຫຼັງດຳເນີນເປັນເວລາ 2 ອາທິດເຕັມ ການຝຶກອົບຮົມເທື່ອນີ້ນັກສຳມະນາກອນໄດ້ຮຽນຮູ້ເຕັກນິກ ການນຳໃຊ້ເຄື່ອງມືເຂົ້າໃນການສຳຫຼວດ-ວັດແທກການນໍາໃຊ້ໂດຣນ UAV Phantom 4 RTK, ຝຶກການວາງແຜນການບິນ, ການບີນຖ່າຍພາບທາງອາກາດດ້ວຍ Drone, ການສ້າງ GCP, ການປະມວນຜົນພາບຖ່າຍ ຫຼື ການຕໍ່ພາບຖ່າຍເພື່ອສ້າງເປັນແຜນທີ່ພາບຖ່າຍທາງອາກາດດ້ວຍໂປຼແກມPix4D,2)ພື້ນຖານການສຳຫຼວດ -ວັດແທກ ແລະ ສ້າງແຜນ ທີ່ຕາດິນ, ນຳສະເໜີພາກທິດສະດີການນຳໃຊ້ກ້ອງ RTK ແລະ ຄວາມຮູ້ພື້ນຖານກ່ຽວກັບສະຖານີ CORS, ນໍາສະເໜີພາກທິດສະດີການນໍາໃຊ້ໂປຼແກຼມ Landstar7, ພື້ນຖານການນຳໃຊ້ໂປຼແກຼມQGIS,ການນໍາສົ່ງຂໍ້ມູນຈາກການສໍາຫຼວດ - ວັດ ແທກພາກສະໜາມມາເຂົ້້າໃນໂປຼແກຼມ QGIS ເພື່ອທຳການຕົບແຕ່ງແຕ້ມຕອນດິນ,ກວດກາຄຸນນະພາບຕອນດິນ ເພື່ອຈະນຳສົ່ງຂໍ້ມູນເຂົ້າໄປໃນຖານຂໍ້ມູນ LaoLandReg ຈົນຮອດການປະກອບແບບພີມ ກ2 ຜ່ານການຝຶກອົບຮົມຊຸດນີ້ສາມາດຕີລາຄາຄວາມຮັບຮູ້ເຂົ້າໃຈຂອງນັກສຳມະນາກອນແຕ່ລະດ້ານສະເລ່ຍລວມ 65 % ເນື້ອງໃນໂອກາດການຈັດຊຸດຝືກອົບຮົມຄັ້ງນີ້ທາງເບື້ອງໂຄງການ GIZ ກໍ່ຍັງໄດ້ມອບເຄື່ອງອຸປະກອນຮັບໃຊ້ຈຳນວນຫນື່ງໃຫ້ ສາມເມືອງເປົ້າຫມາຍ ແລະ ພະແນກ ຊສ ແຂວງ ເປັນຕົ້ນແມ່ນ ຄອມພິວເຕີຕັ້ງໂຕະໃຫ້ເມືອງລະຊຸດ ແລະ ຈັກປຼີນເຕີ 1 ຫນ່ວຍໃຫ້ທາງຂະແຫນງທີ່ດິນເພື່ອນຳໃຊ້ເຂົ້າໃນວຽກງານດັ່ງກ່າວ ໂດຍແມ່ນທ່ານ ວິລະເດດ ສີສຸລາດ ຕາງຫນ້າທາງໂຄງການ GIZ ຂື້ນເປັນຜູ້ມອບພ້ອມດ້ວຍວິຊາການສາມເມືອງເປົ້າຫມາຍ,ມີຄະນະພັກພະແນກ,ຄູຝືກ ແລະ ນັກສຳມະນາກອນເຂົ້າຮ່ວມເປັນສັກຂີພິຍານນຳ.
ຕອນທ້າຍ ປະທານ ໄດ້ມີຄຳເຫັນໂອ້ລົມຕໍ່ທີ່ປະຊຸມ ກ່ອນອື່ນທ່ານ ໄດ້ສະແດງຄວາມຍ້ອງຍໍຊົມເຊີຍນຳຂະແຫນງທີ່ດິນ ແລະ ພັກ-ລັດ ທີ່ໃຫ້ການສະໜັບສະໜູນວຽກງານການຮັບຮູ້ສິດນໍາໃຊ້ທີ່ດິນຕາມປະເພນີ ແລະ ທີ່ດິນປ່າໄມ້ ຢູ່ໃນເຂດ 03 ປະເພດປ່າ ຢູ່ແຂວງຫົວພັນ ເປັນຕົ້ນດ້ານອຸປະກອນເຄື່ອງມືຮັບໃຊ້ຕ່າງໆ ພ້ອມທັງການສິດສອນ ດ້ານເຕັກນິກແຕ່ລະໜ້າວຽກໃຫ້ນັກສຳມະນາກອນໄດ້ຮໍ່າຮຽນເອົາບົດຮຽນອັນໃໝ່ເພື່ອນໍາໄປຈັດຕັ້ງປະຕິບັດວຽກງານຕົວຈິງທັງນີ້ກໍ່ເພື່ອເປັນການຍົກລະດັບຄວາມຮູ້ຄວາມສາມາດໃຫ້ແກ່ພະນັກງານ-ວິຊາການກ່ຽວກັບການສຳຫຼວດ-ວັດແທກ ແລະ ສ້າງແຜນທີ່ຕາດິນດ້ວຍການນໍາໃຊ້ໂດຣນ UAV Phantom 4 RTK ຢູ່ແຂວງຫົວພັນໃຫ້ນັບມື້ດີຂື້ນ.
